Wokeen in Hamborg mitn Bus, mit de U-Bahn oder Stratenbahn ünnerwegens is, schall vandaag mol op de niege Reklaam vun den HVV acht geven. Denn de Posters sünd all op Plattdüütsch (kiek rechts).
Mit plietsche Snacks as "Wenn nix mehr löppt, löppt de HVV" ward op de Hamborger Wuddels vun den HVV henwiesen. Illustreert sünd de Plakaate vun Wolf-Rüdiger Marunde. He hett bannig scheune Bilders tekent, de in sien typische Marunde-Oort een besünneres Heimatgeföhl wedderspegeln.
Op de Internetsiet vun'n HVV gifft dat tosätzlich de plattdüütschen Snacks to'n Anhören - un ok as Översetten op Hochdüütsch. Utdacht hebben sik de Reklaam Werbelüüd vun de Agentur "To'n gülden Bock" ut Hamborg (nee, is keen Kroog, heet blots so).
Veröffentlicht am: 2012-04-24 21:54:38